С.Амарсайхан: 20 тэрбум төгрөгөөр хүүхдийн автобус 70 ширхгийг авсан гэсэн, нэг бүрийн үнийг мэдэхгүй

Одоогийн УИХ-ын гишүүн, хотын дарга асан С.Амарсайхан өнгөрсөн оны 11-р сард "Сургуулийн автобус" төслийг санаачлан хэрэгжүүлсэн. Төслийн хүрээнд өнгөрсөн онд 40 хүүхдийн автобус нийслэлийн төсвийн хөрөнгөөр оруулж ирсэн бол энэ онд 75 автобус оруулж ирэхээр хөрөнгийг шийдээд байгаа юм. Гэвч хүүхдийн автобусыг зах зээлийн үнээс 2-3 дахин өндөр өртгөөр оруулж ирсэн гэх асуудал гарч Төрийн тэргүүн хүртэл шүүмжлэлтэй хандсан. Уг асуудлыг УИХ-ын гишүүн С.Амарсайханаас тодрууллаа.

2019 онд хүүхдийн автобус төслийн хүрээнд их тойрууд байршилтай ерөнхий боловсролын 17 сургуульд 26 автобус, хотын захын 12 сургуульд 14 автобусыг хүлээлгэн өгсөн. Улмаар энэ хичээлийн жилээс 29 сургуулийн 35 чиглэлд сургуулийн автобус үйлчилж үр дүн сайн байгааг албаны хүмүүс хэлсэн юм. Тиймээс гурван жилийн хугацаанд 200 ширхэг хүүхдийн автобусыг үе шаттай оруулж ирэхээр төлөвлөж энэ онд орж ирэх 75 автобусаас эхний ээлжинд тавыг оруулж ирэн сургуулиудад хүлээлгэн өгсөн. Гэвч автобус нэг бүрийн үнийг 130 мянган доллар гэж албаны хүн мэдээлсэн ч Хятад Улсын худалдааны сайт дээр 44 мянган доллараар худалдаалагдаж байгаа мэдээлэл цацагдсан. Үүнтэй холбоотойгоор хотын дарга асан С.Амарсайхан болон холбогдох албаны хүмүүс Хүүхдийн автобус төслийн хүрээнд хэдэн арван тэрбум төгрөгийг завшсан эсэх асуудал олон нийтийн анхаарлыг татаад байна. Тэгвэл С.Амарсайхан гишүүний тухайд нэг бүрийн үнийг нарийн мэдэхгүй ч өндөр үнээр аваагүй гэлээ.

ХҮҮХДИЙН АВТОБУСНЫ НЭГ БҮРИЙН ҮНЭ, ТЕНДЕРТЭЙ ХОЛБООТОЙ АСУУДЛААР АЛБАНЫ ХҮМҮҮС ТАЙЛБАР ХИЙНЭ

Тэрээр хотын даргаар ажиллаж байхдаа нийслэлийн автозамын түгжрэлийг бууруулах чиглэлд нийтийн тээврийн шинэчлэлд таван чиглэлийн ажлын төлөвлөгөө гаргасны нэг нь Хүүхдийн автобус төсөл юм. Харин төслийн хүрээнд тендер зарлаж сонгон шалгаруулалт хийгээгүй гэх асуудал мөн сөхөгдсөн. Тэгвэл худалдан авах бүх ажиллагаа хуулийн хүрээнд хийгдсэн гэдгийг хэллээ. Энэ онд оруулж ирэхээр төлөвлөсөн 75 автобусны төсвийг нийслэлээс шийдсэн гэж байгаа. Тэгвэл нэг бүрийн үнийг 130 мянган доллараар төсөвлөөд 44 мянган доллараар худалдан авсан бол 20-иод тэрбум төгрөгийн үнийн зөрүү гарч байгаа. Ямартай ч хүүхдийн автобусны нэг бүрийн үнэ, тендер тойрсон асуудлын талаар албаны хүмүүс удахгүй мэдээлнэ гэлээ.

Сэтгэгдэл (0)

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

Сэтгэгдэл бичигдээгүй байна