21 хоног тусгаарлалтад байж байгаад гарч гэртээ харьсан олон улсын тээврийн жолооч болон түүний эхнэрээс халдвар илэрч Улсын хэмжээнд онц байдал зарлалаа.
Тэрээр гэртээ гарсан хугацаандаа “UB palace” концертын танхимд энэ сарын 8-ны өдөр болсон “Хархан нүдэн” тоглолтыг дүү, эхнэрийн хамт ирж үзсэн байдаг. Иймд “UB palace”-д өнөөдрөөс эхлэн хөл хорио тогтоосон байна.
Өглөөнөөс эхлэн халдвар дотооддоо алдлаа гэх олон мэдээлэл дунд иргэд түгшүүртэй байлаа. Үүний араас Эрүүл мэндийн яам УОК-той хамтран мэдээлэл хийсэн билээ.
ХӨСҮТ-ийн Ерөнхий захирал Д.Нямхүү:
-24 хүнд шинжилгээ хийхэд хоёр хүнээс халдвар илэрлээ. Тодруулбал, халдвартай жолооч Д-гийн хадам ээж болон тэдэнтэй хамт тоглолт үзсэн дүүгээс нь Covid-19 илэрлээ. Эдгээр хүмүүсийн хавьтал болсон хүмүүсийг судалж байна. Шинээр халдвар илэрсэн хүмүүст зовиур байхгүй. Энх-Саран сувилалд халдвар алдсан байж магадгүй гэж үзсэн учраас өнгөрсөн шөнө 67 хүнийг ХӨСҮТ-д шилжүүлсэн. Хоёр хүнтэй хавьтсан арав гаруй хүнийг нэмж тусгаарласан гэв.
Халдвартай болох нь тогтоогдсон иргэн “ЭНХ САРАН” сувилалд тусгаарлалтад байсан. Тусгаарлалтын хугацаа дуусахаас өмнөх хоногт гарах гэж байсан хүний өрөөнд гаднаас шинээр тусгаарлалтад ирж буй хүнийг нэмж оруулсан гэсэн мэдээлэл бий.
Мөн “ЭНХ САРАН” сувилал хяналт муу байсан төдийгүй жолооч нар өрөө хэсэж байсныг тогтоосон гэдгийг Эрүүл мэндийн яамнаас мэдээлсэн.
Тухайн сувилал тусгаарлах журам зөрчсөн, халдвар хамгааллыг гүйцэлдүүлэхдээ буруу ажилласан, нэг өрөөнд хоёр хүн оруулсан, тусгаарлалтад байсан иргэдийг өрөө хэсүүлсэн зэрэг буруутай үйлдлээрээ Монгол Улсын гурван сая иргэнийг эрсдэлд орууллаа.
Сүүлийн мэдээллээр жолоочоос эхэлсэн халдварын хавьтал 2000 гаруй иргэн байгаа аж. Албаныхан эрсдэлтэй байж болох бүхий л тандалт судалгааг хийж ажиллаж байгаа гэдгээ онцгойлон хэлсэн. Гэхдээ тун эрсдэл өндөр байгаа гэдгээ ч хэлээд авсан билээ.
Тэр ч бүү хэл жолоочийн хадам ээж болон дүүгээс нь илрээд байгаа. Дүү нь МУБИС-д суралцдаг оюутан байсан гэх бөгөөд олныг хамарсан сагс, волейболын тэмцээнд оролцсон байна. Ингээд бодохоор халдвар авсан байж болзошгүй иргэдийн тоо нэмэгдсээр байгаа юм.
Сэтгэгдэл бичигдээгүй байна