Д.Нарангэрэл: Түргэн оношлуураар уушгины архаг бронхиттой хүн эерэг гарахгүй

Коронавирусний нөхцөл байдлын талаар ЭМЯ-ны ээлжит хэвлэлийн хурал боллоо. Өнгөрсөн 24 цагт ХӨСҮТ-ийн хоёр лаборатори, ЗӨСҮТ, Дорнод, Дархан-Уул аймгийн салбар лабораторид  өчигдөр буюу энэ сарын 17-нд нийт 1643 хүнд шинжилгээ хийхэд 20 хүнд коронавирус илэрсэн талаар мэдээлсэн юм. Хэвлэлийн хурлын дараа ХӨСҮТ-ийн Тандалт судалгааны албаны дарга А.Амбасэлмаа, ЭМЯ-ны Нийгмийн эрүүл мэндийн газрын дарга Д.Нарангэрэл, УОК-ын Шуурхай штабын дарга, хурандаа Б.Ууганбаяр нар сэтгүүлчдийн асуултад хариулав. -Дэлхийн улс орнуудаас коронавирусний эсрэг амжилттай тэмцэж байгаа ямар туршлага байна вэ? Д.Нарангэрэл: Шинэ Зеланд улсын туршлага бий. Хавьтлыг илрүүлэх, батлагдсан тохиолдлуудыг тусгаарлах, кластер өвчлөлийг хянах, шинжилгээ хийх, гадаад болон дотоод орчинд бүх нийтээрээ амны хаалт зүүх зэрэг сайн туршлага бий. Мөн 4 сар орчим хатуу хөл хорионы дэглэмийг сайтар сахьсан. Бид бусад орны туршлагыг судлах, нэвтрүүлэх шаардлагатай байна. -Түргэн оношлуураар уушгины архаг бронхиттой хүн эерэг гарах магадлалтай юу? Д.Нарангэрэл: Ийм зүйл байхгүй. Зөвхөн коронавирус илрүүлнэ. Гэхдээ 100 хувь баттай биш. Цусны шинжилгээ 45-60 хувийн магадлалтай, эсрэг бие илрүүлж байгаа оношлуур бол 90-95 хувийн баталгаатай. Энэ бол хуурамч сөрөг, хуурамч эерэг байна.