Нийслэлд дөрвөн голомт идэвхтэй үргэлжилж буйг ХӨСҮТ-ийн Тандалт, судалгааны албаны дарга А.Амбасэлмаа өнөөдрийн хэвлэлийн хурлын үеэр мэдээлэв.
Сүүлийн дөрөв хоногт БЗД-ийн 8 дугаар хорооны “X апартмент” байрны голомт хамгийн идэвхтэй байна. Тухайн байранд өргөжүүлсэн тандалтаар нийт 560 хүнд шинжилгээ хийхэд найман хүн халдварт өртсөн нь батлагджээ. Мөн Наркологийн төв эмнэлэгтэй холбоотой голомт идэвхтэй байгаа бөгөөд хоёр хүн өвчилснөөс тэдний гэр бүл, найз нөхөд долоон хүнээс халдвар илэрчээ. Түүнчлэн Микс пиццаны газрын ажилтан өвчилсөн тул өргөжүүлсэн тандалт явуулахад зургаан хүн халдвартай нь тогтоогдсон байна.
БГД-ийн 12 дугаар хорооны 19 дүгээр байрны голомт үргэлжилж байгаа аж.
Мөн тэрбээр хэлэхдээ, "Батлагдсан тохиолдлын ойрын хавьтлын хоёрдогч хавьтал албан байгууллагуудын хүмүүст шинжилгээ хийж байна. Тухайлбал, “X апартмент” байранд гарсан батлагдсан тохиолдлын ойрын хавьтал NTV телевизэд ажилладаг учир хоёрдогч хавьтал 94 хүнд шинжилгээ хийсэн. Шинжилгээ үргэлжилж байна. Мөн “Bull” ресторанд батлагдсан тохиолдлын хавьтал байсан учраас 40 хүнд шинжилгээ хийхэд сөрөг гарсан. Хан-Уул дүүргийн 11 дүгээр хорооны 209 дүгээр байранд коронавирусний халдвар илэрсэн тул 80 хүнд шинжилгээ хийсэн. Мөн СБД-ийн 9 дүгээр хорооны "Цэлмүүн тауэр"-т халдвар гарсан тул 119 хүний шинжилгээ үргэлжилж байна” гэв.
НЭМГ-аас эдгээр голомтод байршлаар нь шинжилж өчигдөр 2000 гаруй хүний шинжилгээг лабораториудад хүргүүлжээ. Эдгээр батлагдсан тохиолдлын ойрын хавьтал 1163 хүн байгаа бол хоёрдогч хавьтал 7220 хүн байгаа аж.
ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Сэтгэгдэл бичигдээгүй байна