Тусгай үүргийн нислэгийн үнийг бууруулна

Монгол Улсын Засгийн газрын өнөөдрийн /2021.02.17/ ээлжит хуралдаан Төрийн ордонд үргэлжилж байна. Хуралдаанаар ирэх гуравдугаар сарын 01-ний өдрөөс сургууль, цэцэрлэгийг танхимаар хичээллэх эсэх асуудлыг хэлэлцэж байгаа талаар албаныхан мэдээллээ. Учир нь, Боловсрол шинжлэх ухааны яамнаас ирэх сарын 01-нээс сурагчдыг танхимаар хичээллүүлэх байр суурийг илэрхийлээд байгаа юм. Тэгвэл салбар яамны дээрх саналыг Улсын Онцгой комиссын дарга, Шадар сайд С.Амарсайхан эсрэг байр суурьтай байгаа аж. Өөрөөр хэлбэл, Шадар сайдын зүгээс сурагчдыг танхимаар хичээллүүлэх нь эрсдэлтэй гэж үзэж байгаа юм байна. Гэхдээ эцсийн шийд гараагүй гэдгийг яриандаа тодотголоо. Түүнчлэн ирэх сард зургаан удаагийн тусгай үүргийн нислэг үйлдэж, иргэдээ эх оронд нь авч ирэхээр төлөвлөөд байгаа аж. Үүнээс гадна тусгай үүргийн нислэгийн үнэ, тарифыг бууруулах асуудлыг Засгийн газрын хуралдаанаар хэлэлцэж байгаа гэдгийг Засгийн газрын Хэвлэл мэдээлэл, олон нийттэй харилцах хэлтсийн дарга Ц.Ганзориг хэллээ.