Өндөржүүлсэн байдлын зэрэг 6 дугаар сарын 2 хүртэл үргэлжилнэ

Өнөө үйлчилж буй бүх нийтийн бэлэн байдлын өндөржүүлсэн байдлын зэрэг 6 дугаар сарын 2 хүртэл үргэлжилнэ гэдгийг УОК-ын шуурхай штабаас мэдээллээ.

Худалдааны томоохон төв захууд, цайны газруудын үйл ажиллагаа хэзээ нээгдэх гэсэн асуултад УОК-ын шуурхай штабаас дээрх үйлчилгээний газруудыг нээхийг энэ сарын 22 хүртэл түр хойшлуулаад байна гэсэн хариуг өгч байна. Гэхдээ "COVID-19"-ийн халдварын тухайн үеийн нөхцөл байдал, дэгдэлтээс хамаарч олон хүнийг нэг дор бөөгнөрүүлэхгүй байх үүднээс энэ талаар буюу нээгдэх эсэх талаар тухайн үед мэдээлнэ гэдгийг мэдэгдлээ. 

Мөн энэ сарын 22-ноос иргэд аймаг, орон нутагт чөлөөтэй зорчих эсэх талаарх асуултад, вакцины 2 тунд бүрэн хамрагдаж, 14-өөс дээш хоносон, буяны ажлаар яваа болон эрүүл мэндийн хүндэтгэх шалтгаантай иргэдийг PCR-ийн шинжилгээ шаардахгүйгээр орон нутаг руу нэвтрүүлж буйг мэдэгдлээ. Ийм иргэдийг орон нутагт очсон хойно тусгаарлахгүй харин хүүхдийг 7 хоног гэрээр тусгаарлана. Энэ шийдвэр бүхий түр зохицуулалтын журам 5 дугаар сарын 22 хүртэл хүчинтэй байгаа, түүнээс цааш дараагийн шийдвэр гарна гэдгийг УОК-ын шуурхай штабын ажилтан, ОБЕГ-ын хурандаа Ч.Мөнхбат мэдэгдлээ.

Орон нутагт очсон хүүхдийг 7 хоног гэрээр тусгаарлана.

Тодруулбал, Бүх нийтийн бэлэн байдлын өндөржүүлсэн байдлын зэрэг 6 дугаар сарын 2 хүртэл үргэлжилнэ. Тиймээс 5 дугаар сарын 22-ноос 6 дугаар сарын 2 хүртэл ямар шийдвэр гаргахыг тухайн үед мэдээлнэ гэж байна. 

Ташрамд мэдээлэхэд өчигдрөөс эхлэн 10 хүнээс ихгүйгээр, хүн хооронд 2 метрийн зайтай үйлчилж байхаар сургалтын төвүүд, мөн кофешоп нийт заалны 50 хувийн багтаамжид, бассейн, фитнесс төвүүд дээрх байдлаар үйлчлэхээр тус тус үйл ажиллагаагаа нээгээд байгаа юм.