"Реал Мадрид" талбайдаа "Шахтёр" клубт хожигдлоо

Аваргуудын лигийн хамгийн олон удаагийн аварга, Испанийн эзэн хааны баг "Реал Мадрид" урьд шөнө Украины "Шахтёр" клубд талбайдаа 2:3-аар ялагдал хүлээлээ. "Шахтёр" клубийн гол тоглогчид коронавирусын халдвар авч уг тоглолтод оролцоогүй ч тэд эхний хагаст 0:3-аар давамгайлсан юм. Уг давамгайллаа эцсийн мөч хүртэл хадгалж, "Реал Мадрид"-ын талбайгаас үнэтэй хожил авлаа. Ингэснээр Шахтёр 1999 оны 3-р сараас хойш Реал Мадридыг буулган авсан анхны Украины клуб болсон байна. Тэднээс өмнө Динамо Киев, "Эзэн хааны баг"-ийг 2:0-ээр хожиж байсан аж. Тоглолтын хоёрдугаар үед "Реал Мадрид"-аас Лука Модрич, Винисиус Жуниор нар гоол оруулсан ч талбайн эзэд тоог тэнцүүлж чадалгүй хожигдсон. "Реал Мадрид" өмнө нь 2005 оны 9-р сард "Лион"-той тоглохдоо эхний үед гурван гоол алдсан бол 2000 оны 2-р сард "Байерн Мюнхэн"-ий эсрэг талбайдаа хийсэн тоглолтын нэгдүгээр хагаст мөн хэмжээний гоол алдаж байжээ.