Грек улсад коронавирусын эсрэг вакцинжуулалтад арван хүн тутмын долоо нь хамрагдах хүсэлтэй байгааг хоёр өөр санал асуулгын дүн харуулжээ.
Грект эхний ээлжид эмнэлгийн ажилтнууд, асрамжийн газрын үйлчлүүлэгчдийг вакцинжуулсан бөгөөд өнгөрсөн долоо хоногийн амралтын өдрүүдээс 85-аас дээш насны иргэдэд вакцин хийж эхэлсэн байна.
“Alpha” суваг, “Political” сонины явуулсан санал асуулгын дүнгээс үзэхэд, судалгаанд оролцогчдын 70.1, 74 хувь нь вакцин хийлгэхээр бүртгүүлнэ гэж хариулжээ.
Грект өнгөрсөн оны 12 дугаар сарын 27-нд Ерөнхийлөгч Катерина Сакелларопулу, Ерөнхий сайд Кириакос Мицотакис, өндөр настай эрэгтэй, сувилагч нар вакцины эхний тунг тариулснаар вакцинжуулалтын хөтөлбөрийг эхлүүлсэн юм.
Грект вакцинжуулалтыг үнэ төлбөргүй явуулж байгаа бөгөөд эмзэг бүлгийн хүмүүсийг дархлаажуулсны дараа олон нийтийг хамруулна. Засгийн газрын мэдээллээр, өнгөрсөн бямба гаргийн байдлаар орон даяар 80 мянга гаруй хүнд вакцин хийжээ.
Ташрамд дурдахад, дэлхий дахин коронавирусын 237 вакциныг гарган авахаар ажиллаж байгаагаас 64 вакцины эмнэлзүйн туршилт үргэлжилж байна гэж Дэлхийн эрүүл мэндийн байгууллага энэ сарын 15-нд мэдээлжээ.
ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Сэтгэгдэл бичигдээгүй байна