Бэлгийн хүчирхийллийн хохирогч / даван туулагчдад сэтгэл зүйн анхан шатны зөвлөгөөг “Хөөрхөн Зүрх” ТББ 24 цагийн турш үзүүлж байна.
“КОВИД-19” цар тахлаас үүдэн иргэдийн санхүүгийн тогтвортой байдал, эрүүл мэнд, сэтгэл зүй зэрэгт олон хүчин зүйл нөлөөлж үүнийг дагаад сэтгэл зүйн үйлчилгээний хэрэгцээ нэмэгдэж байна. Гэтэл хөл хорионоос үүдэн сэтгэл зүйн үйлчилгээ авах, мөн санхүүгийн хязгаарлагдмал байдал нь бэлгийн хүчирхийллийн даван туулагчдын сэтгэцийн болон биеийн эрүүл мэндэд бий болох эрсдэлийг нэмэгдүүлж байна.
ХЯМРАЛЫН ҮЕИЙН СЭТГЭЛ ЗҮЙН АНХАН ШАТНЫ ТУСЛАМЖ, ҮЙЛЧИЛГЭЭ ГЭЖ ЮУ ВЭ?
Хямралын үеийн сэтгэл зүйн анхан шатны тусламж үйлчилгээ нь тулгамдаж буй асуудлыг даван туулахад дэмжлэг үзүүлэх зөвлөгөө, үйлчилгээ юм.
ТУСЛАМЖИЙН УТСАНД ХОЛБОГДСОНООР ЯМАР ТӨРЛИЙН ҮЙЛЧИЛГЭЭ АВАХ БОЛОМЖТОЙ ВЭ?
Та сэтгэл зүйн анхан шатны тусламж, үйлчилгээнд холбогдсоноор зөвлөгч тань дараах зүйлүүдэд дэмжлэг үзүүлэх боломжтой. Үүнд:
Сэтгэл зүйн байдлыг тогтворжуулах, тайвшрахад дэмжлэг үзүүлэх Сэтгэл хөдлөлийг таних, эрүүлээр зохицуулахад дэмжлэг үзүүлэх Тулгамдсан асуудлыг даван туулахад мэргэжлийн дэмжлэг үзүүлэх Тааламжгүй бодлыг тайвшруулах, хүлээн зөвшөөрөхөд дэмжлэг үзүүлэх
Зөвлөгч шаардлагатай тохиолдолд танд тусламж, дэмжлэг үзүүлэх төрийн болон төрийн бус байгууллагад холбон зуучилна.
ХЭН СЭТГЭЛ ЗҮЙН АНХАН ШАТНЫ ТУСЛАМЖИЙН УТСАНД ХАНДАХ БОЛОМЖТОЙ ВЭ?
Бэлгийн хүчирхийллийн даван туулагч бол нас, хүйс харгалзахгүй сэтгэл зүйн анхан шатны тусламж үйлчилгээ авах боломжтой.
Бэлгийн дарамт, хүчирхийлэл гэж юу вэ?
Бэлгийн хүчирхийлэл, дарамт гэдэг нь зөвхөн бэлгийн харилцаанд хүчээр орохоор хязгаарлагдахгүй бөгөөд танд таагүй мэдрэмж төрүүлсэн бэлгийн сэдэлтэй үйлдэл, эс үйлдлийг багтааж үзнэ. Үүнд:
Хүсээгүй байхад биеийн тань аль нэг хэсэгт хүрэх, хүрэхийг оролдох Хүсээгүй байхад биеийн тань аль нэг хэсгийг үнсэх, үнсэхийг оролдох Бэлгийн сэдэлтэйгээр удаан харах, ширтэх Бэлгийн сэдэлтэй үг, өгүүлбэр ашиглаж мессеж бичих Бэлгийн сэдэлтэй үг, өгүүлбэр ашиглаж доог тохуу хийх, онигоо ярих Бэлгийн сэдэлтэй үг, үйлдэл агуулсан зураг, бичлэг илгээх Хүсээгүй байхад бэлгийн харилцаанд орохыг шаардах, айлган сүрдүүлэх
Зөвлөгөө өгөх дугаар - 80089688
ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Сэтгэгдэл бичигдээгүй байна